Օտարականները շուտով պիտի կարենան Հայաստանի մէջ ներդրումներ կատարել առանց երկիրը այցելելու:

Երկուշաբթի օր, լրագրողներու հետ իր հարցազրոյցին ընթացքին, արդարադատութեան փոխնախարար Վահէ Դանիէլեան ըսաւ, որ Հայաստանի շարք մը օրէնքներու կատարուած փոփոխութիւնները օտարականներու հնարաւորութիւն կու տայ Հայաստանի տեղական ընկերութեան մը մէջ ներդրումներ կամ արեւտրական աշխատանքներ կատարել` առանց երկիր այցելելու: Անոր խօսքով, արտասահման գտնուող Հայաստանի հիւպատոսութիւնները այժմ կրնան Հայաստանի մէջ օտար սեփականութիւն հանդիսացող արեւտուր արձանագրել, կամ օտարականի կողմէ հայկական ընկերութեան բաժնեմասի ձեռքբերումը ձեւակերպել: «Այս լաւ գործիք է օտարական նոր ներդրումներ ներգրաւելու համար, բայց ժամանակը ցոյց պիտի տայ, թէ որքանով արդիւնաւէտ պիտի ըլլայ այս քայլը»,- ըսաւ Դանիէլեան՝ աւելցնելով, որ Հայաստանի հիւպատոսարանները նոյնականացման եւ գրանցման աշխատանքները կատարելու արտօնութիւն պիտի ստանան: Ըստ անոր՝ դեռ պարզ չէ՝ արդեօ՞ք այս նոր ծառայութիւնը պահանջարկ կ'ունենայ, բայց ան լաւ միջոց է, որ կրնայ ներդրումներ ներգրաւել, եւ օտար երկիր ապրողին օգնել որ արեւտրական կամ ներդման աշխատանքներ կատարէ հայկական ընկերութեան մը հետ ՝ առանց Հայաստան այցելելու: Բացի այդ, այս ոլորտին մէջ կատարուեցան նաեւ այլ բարեփոխումներ. մասնաւորապէս, կրճատուեցան ընկերութեան գրանցման եւ ստեղծման ժամկէտները: Բացի այդ, օտարականները շուտով պիտի կարենան առցանց պանքային հաշիւ բանալ Հայաստանի մէջ: Դանիէլեան նշեց նաեւ, որ կը նախատեսուի, որ երեք ամսուայ ընթացքին պիտի ընդունուին համապատասխան ենթա-օրէնսդրութիւններ, եւ միւս բոլոր հարակից ընթացակարգերը հնարաւորինս արագ պիտի հաստատուին:

https://www.yerepouni-news.com/2021/05/17/foreigners-to-be-able-soon-to-acquire-a-business-in-armenia-or-make-an-investment-in-a-local-company-without-having-to-visit-the-country/

SHARE ON

Submit a comment

Your email address will not be published. Required fields are marked *

Մեկնաբանութիւն կատարեցէ՛ք

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով