Յայտնի բեմադրիչ Սերկէյ Փարաճանովի «Յակոբ Յովնաթանեան» (Հայաստան, 1967), «Քիեւեան որմնանկարներ» (Ուքրանիա, 1966) եւ «Արաբանախշեր Փիրոսմանիի թեմաներով» (Վրաստան, 1985) վերականգնուած կարճաչափ ֆիլմերու ժապաւէնային նոր տպագրութիւնները (35 մմ) յանձնուած են Ժամանակակից արուեստի թանգարանին:
Այս առթիւ Յունուար 19-ին եւ 20-ին ԺԱԹ-ը արուեստասէր հանդիսատեսին ներկայացուցած է Փարաճանովի բանաստեղծական վաւերագրական ֆիլմը՝ «Տրիպտիխ», իր «Փրկել եւ նախագծել» ֆիլմերու պահպանման միջազգային ամէնամեայ փառատօնի ծիրէն ներս:
Վերականգնումները ֆինանսաւորած է Fixafilm-ը, իսկ 35 մմ-ի փոխադրումը՝ ՀԲԸՄ-ի նիւեորքեան մասնաճիւղը:
Հայաստանի Ազգային շարժապատկերի կեդրոնը իր պահպանութեան տակ առած է տպագրուած օրինակներէն մէկը, միւս երկուքը նուիրուած են Վրաստանին եւ Ուքրանիոյ:
Նիւ Եորքի Ժամանակակից արուեստի թանգարանը եւ Փարիզի Փոմփիտու կեդրոնը ստացած են նաեւ ուրիշ ֆիլմերու օրինակներ: Փարաճանովի «Յակոբ Յովնաթանեան»-ը առաջին հայկական ֆիլմն է, որ պահպանուած է միջազգային նշանակութեան այս երկու խոշոր կեդրոններուն մէջ:
https://www.panorama.am/en/news/2022/01/21/Parajanov-MoMA-festival/2629755
