Վերականգնողական նորարարական սարքերու կառուցումին ու արտադրութեան մէջ մասնագիտացած առաջին հայկական ընկերութիւնը՝ «ՔայլԹեք»-ը, կը մշակէ նոր VR սարքաւորում մը, որ նախատեսուած է հաշմանդամութիւն ունեցող անձանց համար:
2016-ի ապրիլեան պատերազմէն ետք խումբ մը հայ քինեզոլոկներ համախմբուեցան եւ սկսան կամաւոր աշխատիլ հաշմանդամութիւն ունեցող զինծառայողներու հետ: Երկար տարիներու աշխատանքի շնորհիւ մասնագէտները նկատեցին, որ Հայաստանի մէջ չկան անհրաժեշտ քանակի վերականգնողական սարքեր: Ուստի իրենք ձեռնարկեցին անոնց արտադրութեան: Այսպէս է, որ հիմը դրուեցաւ «ՔայլԹեք»-ին:
2018-ին «ՔայլԹեք»-ը պատրաստեց արտակմախքի առաջին նմոյշը եւ շարունակեց զայն կատարելագործել յաջորդող տարիներուն: «ՔայլԹեք»-ի սարքերը յաջողութեամբ կ'օգտագործուին հիւանդանոցներու եւ վերականգնողական կեդրոններու մէջ:
«ՔայլԹեք»-ի հիմնադիր Արսէնեան կ'ըսէ, որ Հայաստան չի կրնար շուկայ ըլլալ իրենց արտադրանքին համար, ուստի իրենք կը ձգտին մուտք գործելու միջազգային շուկայ, որուն նախադրեալները ունին. միջազգայնօրէն որակաւորուած, բարձրորակ սարքաւորում՝ մրցունակ գիներով:
Ամբողջական լուրը կարդալ «Արմէնփրես»-ի մէջ՝
