1972 թուականին ծնած Սարգիս Իզմիրլեանը Ժնեւէն (Զուիցերիա) յայտնի Իզմիրլեան ընտանիքի միլիառաւոր հարստութեան ու գետնանուշի պիզնեսի ժառանգորդն է: Միլիառատէր Սարգիս Իզմիրլեանի մեծ հայրը 20-րդ դարու սկիզբը յայտնուած է Զուիցերիա՝ փախչելով Օսմանեան կայսրութեան իրագործած Հայոց ցեղասպանութենէն: Ընտանեկան պիզնեսի հիմնադիրը Սարգիսի հայրն էր՝ Տիգրան Իզմիրլեանը, զոր եւրոպական մամուլը կէս դար առաջ կ'անուանէր «գետնանուշի արքայ»: Արդէն 1960-ականներու վերջը երէց Իզմիրլեանը յաջողեցաւ հսկողութեան տակ առնել գամբիական գետնանուշի գրեթէ ամբողջ համաշխարհային արտահանումը եւ ստեղծել գետնանուշի սեփական կայսրութիւնը՝ զուիցերական «Ալիմենտա» ընկերութիւնը:
Ինքը՝ Սարգիսը, երիտասարդ տարիքէն սկսած է աշխատիլ ընտանեկան պիզնեսի մէջ, իսկ համալսարանական ուսումնառութենէն ետք գետնանուշի պիզնեսին զուգահեռ սկսած է շինարարական խոշոր ծրագիրներով զբաղիլ Զուիցերիոյ, Մեծն Բրիտանիոյ եւ աշխարհի այլ երկիրներու մէջ: 2005 թուականին Իզմիրլեան ընտանիքի ընկերութիւններէն մէկը ձեռք բերաւ 5,26 հեքթար հողատարածք, ուր կը գտնուի Լոնտոնի քաղաքապետարանը: Իզմիրլեան ընտանիքի անդամները Հայաստանի մէջ արուեստի խոշոր հովանաւորներն են 1988-էն սկսեալ:
1994-ին Երեւանի մէջ հիմնադրուած է «Իզմիրլեան» հիմնադրամը, որ կը զբաղի գործարարութեան ու կրթութեան զարգացումով, իսկ 2013-ին բացուած է համանուն բժշկական կեդրոնը: Ինքը՝ Սարգիս Իզմիրլեանը, Զուիցերիոյ հայկական կազմակերպութիւններուն աջակցող հիմնադրամի հիմնադիրն է: Հիմնադրամը հոգացած է Եւրոպայի եւ Հայաստանի հայկական եկեղեցիներու, դպրոցներու եւ մշակութային կեդրոններու կառուցման ու վերականգնման ծախսերը: Զուիցերահայը ամէն տարի մեծ միջոցներ կը յատկացնէ «Հայաստան» համահայկական հիմնադրամին եւ ՀԲԸՄ-ին:
