Պոսթոնաբնակ բազմաշնորհ արուեստագէտ եւ ձեւաւորող Թինա Չաքարեանը դարձած է հայկական արուեստի եւ մշակոյթի առաջամարտիկը համաշխարհային բեմի վրայ: Աշխարհի առաջնակարգ արուեստի եւ մշակոյթի ձեռնարկին՝ Վենետիկի Պիեննալէի ծիրէն ներս, անոր առաջնորդութեամբ խմբուած են Հայաստանի եւ սփիւռքի արուեստագէտներն ու ճարտարապետները՝ իրենց տաղանդները ցուցադրելով բացառիկ հարթակի մը վրայ:
Դէպի ապագան նայելով՝ Չաքարեանը կը միտի շահիլ նոր «Ոսկեայ առիւծ» մը, որ Պիեննալէի գերագոյն մրցանակն է, միեւնոյն ատեն ստեղծելով հիմնադրամ մը՝ երաշխաւորելու գալիք սերունդներու յարատեւութիւնը այս կենսական հարթակին վրայ:
Պոսթոնաբնակ բազմաշնորհ արուեստագէտ եւ ձեւաւորող Թինա Չաքարեանը առանցքային դեր ունեցած է հայկական արուեստն ու մշակոյթը համաշխարհային բեմին վրայ ներկայացնելու գործին մէջ, յատկապէս աշխարհի ամէնէն հեղինակաւոր արուեստի եւ մշակոյթի ձեռնարկի՝ Վենետիկի Պիեննալէի ծիրէն ներս։ 2018-էն ի վեր, իբրեւ հայկական տաղաւարի զարգացման տնօրէնուհի, Չաքարեանը էական դերակատարութիւն ունեցած է դրամահաւաքի, ցուցահանդէսներու կազմակերպման, տեղադրումներու վերահսկման եւ ձեռնարկներու համադրման աշխատանքներուն մէջ։
2025-ի Պիեննալէի «Բանականութիւն. բնական, արհեստական, հաւաքական» խորագիրը, զոր ընտրած է անուանի ճարտարապետ փրոֆեսոր Քարլո Ռաթթին, մարտահրաւէր կը նետէ ազգերուն՝ ուսումնասիրելու բանականութիւնը իբրեւ բազմաշերտ երեւոյթ։ Չաքարեանի տեսլականը կը համախմբէ Հայաստանէն եւ սփիւռքէն արուեստագէտներ ու ճարտարապետներ՝ ցոյց տալու համար, թէ անոնց կեանքի փորձառութիւնն ու նորարար գործերը ինչպէ՛ս իւրայատուկ կերպով կ’արձագանգեն Պիեննալէի բնաբանին։
Չաքարեանի նպատակը յստակ է՝ առաջնորդել Հայաստանը դէպի նոր «Ոսկի առիւծ», որ Պիեննալէի գերագոյն մրցանակն է։ Հայաստանը այս յաղթանակը արձանագրած էր 2015-ին՝ «Հայութիւն» խորագրեալ նշանակալից ցուցահանդէսով, որ կը հետազօտէր ազգային ինքնութիւնը։ Չաքարեանը, որ այն ատեն խորհրդատու խումբի անդամ էր, այժմ իր հարուստ փորձառութիւնը կը գործածէ՝ տաղանդաւոր արուեստագէտներու ուղղորդման եւ Հայաստանի ու սփիւռքի միջեւ կամուրջներ հաստատելու գործին մէջ։
Պիեննալէին Հայաստանի մասնակցութիւնը խթանելով՝ Չաքարեանը ոչ միայն կը բարձրացնէ հայ արուեստագէտներուն վարկը, այլ նաեւ կ’ապահովէ հայկական մշակութային ժառանգութեան տեսանելիութիւնը, հեղինակութիւնն ու ճանաչումը։ Անոր աշխատանքը կը նպաստէ, որ Հայաստանը ունենայ հզօր ձայն համաշխարհային արուեստին մէջ՝ միեւնոյն ատեն պահպանելով իր ժառանգութիւնը եւ ներդրում կատարելով ապագայ ստեղծագործ սերունդներու զարգացման մէջ։
Չաքարեանի ջանքերը կը հատեն պարզ ցուցահանդէսներ կազմակերպելու սահմանները։ Ան կը ստեղծէ հիմնադրամ մը՝ ապահովելու Հայաստանի մշտական ներկայութիւնը Վենետիկի յառաջիկայ պիեննալէներուն, երաշխաւորելով, որ հայ արուեստագէտները շարունակական հնարաւորութիւններ ունենան իրենց գործերը ներկայացնելու եւ համաշխարհային մշակութային երկխօսութեան մասնակցելու։ Այս նախաձեռնութիւնը պիտի խթանէ նորահաս տաղանդներու զարգացումը, պիտի արձանագրէ Հայաստանի ներդրումը ժամանակակից արուեստին մէջ եւ հայկական մշակոյթին պիտի շնորհէ կենսական ձայն միջազգային արուեստի համայնքին մէջ։
Հարկազեղչման ենթակայ նուիրատուութիւններ կատարելու մասին յաւելեալ տեղեկութիւններու համար՝ հաճեցէ՛ք դիմել «info@armenianpavilion.com» ել. հասցէին։
