«Ցեղասպանութիւն 2.0. Արցախի ցեղազտումը» վաւերագրական ֆիլմը կը բացայայտէ Ատրպէճանի շարունակական արշաւը՝ ջնջելու հայկական ժառանգութիւնը Արցախի մէջ։ 2024 թուականին, առաջին անգամ ըլլալով 1700 տարուան ընթացքին, Զատիկը չտօնուեցաւ Արցախի մէջ, ինչ որ յստակօրէն կը խորհրդանշէ աւելի քան 120.000 հայերու հարկադիր տեղահանութիւնը իրենց հայրենի հողերէն։ Այս ֆիլմը, որ «Հալածանքի դէմքերը» վաւերագրական շարքին մաս կը կազմէ, կը ներկայացնէ Ատրպէճանի գործողութիւններուն յստակ եւ համոզիչ ապացոյցները՝ ներառեալ հայ ղեկավարներու թիրախաւորումը, բանտարկութիւնը եւ խոշտանգումները։ Ֆիլմին նպատակն է միջազգային հանրութեան ուշադրութիւնը հրաւիրել եւ հաշուետուութիւն պահանջել։
«Հալածանքի դէմքերը» ֆիլմաշարը ստեղծուած է Արցախի ճգնաժամը կապելու մարդկային իրաւանց համաշխարհային նոյնանման այլ խնդիրներու հետ, ինչպիսին են եզիտիներու ցեղասպանութիւնը եւ Նիճերիոյ Քատունա նահանգին մէջ տեղի ունեցող բռնութիւնները։ Այս բաղդատութիւններով՝ նախագիծը կը ձգտի համաշխարհային միասնական արձագանգ ձեւաւորելու։ Էմմիի բազմակի մրցանակակիր բեմադրիչ Պարետ Մարոնեանի կողմէ նկարահանուած «Ցեղասպանութիւն 2.0»-ը կը ցոլացնէ արդարութեան հետամուտ անձնակազմին նուիրումը։
Շարքին առաջին ֆիլմը՝ «10 տարի ետք», կ’անդրադառնայ եզիտիներու ողբերգական ճակատագրին «Իսլամական պետութիւն» ծայրայեղական խմբաւորման տիրապետութեան տակ, միեւնոյն ատեն ընդգծելով Հայաստանի դերը իբրեւ կրօնական ապաստարան՝ աշխարհի ամէնէն մեծ եզիտիական տաճարին հայրենիքը։ Այս պատկերը կ’ընդգծէ Հայաստանի նուիրումը ազգային փոքրամասնութիւններու իրաւունքներուն եւ միջկրօնական փոխըմբռնումին։ Ֆիլմը համաշխարհային տարածում կը գտնէ «JAVA Films»-ի միջոցաւ՝ գլխաւոր ցանցերու՝ «DW (Deutsche Welle)» եւ «RTVE»-ի ճամբով, հասնելով միլիոնաւոր դիտողներու՝ ամրապնդելով «Հալածանքի դէմքերը» ֆիլմաշարին ազդեցութիւնը։
«Ցեղասպանութիւն 2.0»-ի 7-վայրկեանանոց կարճ տարբերակը արդէն առաջադրուած է ԱՄՆ Հեռատեսիլի արուեստներու եւ Գիտութեանց ազգային ակադեմիոյ կողմէ՝ 2024 թուականի «Սանքոսթ շրջանային Էմմի» մրցանակներու (Suncoast Regional Emmy® Awards) կրօնական, կարճ ձեւաչափով բովանդակութիւն անուանակարգին մէջ։
Այժմ «Ցեղասպանութիւն 2.0»-ի ստեղծագործողները աւելի քան պատրաստ են աւարտելու ֆիլմին ամբողջական տարբերակը։ Այս արտադրութեան վճռական հանգրուանին, աջակիցները կրնան նպաստել այս հրատապ նախագիծին՝ իբրեւ անհատներ կամ կազմակերպութիւններ։
Հարկէն նուազեցուող նուիրատուութիւնները կը կատարուին այս յղումով «Մշակութային ազդեցութեան հիմնադրամ»-ին միջոցաւ, որ 501(c)(3) կազմակերպութիւն է, ինչ որ պիտի օգնէ Արցախեան պատմութիւնը հասցնելու համաշխարհային լսարանին եւ արդարութիւն պահանջելու։
Բերելով այս հրատապ պատմութիւնները համաշխարհային բեմ՝ աջակիցները վճռորոշ դեր կը խաղան հայկական հարցը ընդլայնելու եւ յետագայ անարդարութիւնները կանխելու գործին մէջ։ Յաւելեալ տեղեկութիւններու համար հաճեցէք անցնիլ այս յղումով։
