Հինգշաբթի, նոյեմբերի 3-ին, Սպանիոյ երեսփոխանական քոնկրէսը մերժեց վաւերացնել Ատրպէճանի հետ կնքուած միջազգային համաձայնագիր մը։
Ժողովրդական եւ «Ձայն» կուսակցութիւններն ու անկախութեան կողմնակից օրէնսդիրները դէմ քուէարկեցին, 2021 թուականի դեկտեմբեր 14-ին, Մատրիտի մէջ ստորագրուած՝ գաղտնի տեղեկութեան փոխանակման եւ փոխադարձ պաշտպանութեան մասին դիւանագիտական համաձայնագիրը: «Միասին կրնանք» դաշինքը մնաց ձեռնպահ։
Երեսփոխան Եօն Ինիարիթուն համաձայնագիրը որակեց որպէս «անհեթեթութիւն»՝ հաշուի առնելով, որ Ատրպէճանի «յարձակողական վարչակարգը» Արցախի հարցով հակամարտութեան մէջ է Հայաստանի հետ։ Ինիարիթուն Ատրպէճանի վարչակարգը բնութագրեց որպէս «փտած վարչակարգ», «բռնատիրական» եւ «յարձակողական բռնակալութիւն», ինչպէս նաեւ ընդգծեց, որ անիկա «լեցուն է քաղաքական բանտարկեալներով»։
Մէկ այլ երեսփոխան Մարթա Ռոզիքէն քննադատեց Սպանիոյ կառավարութիւնը՝ Հայաստանի եւ Արցախի դէմ «յարձակման հարցով լռելու», ինչպէս նաեւ «Հայոց ցեղասպանութեան նման բարբարոսական իրադարձութիւն մը չճանչնալու համար»։
Աղբիւրը՝ Panarmenian.net
