Ֆրանսայի կուսակցութիւններ նախագահին դիմեցին՝ Արցախի եւ Հայաստանի անվտանգութիւնը երաշխաւորելու

Ֆրանսայի կուսակցութիւններու առաջնորդները երկրի նախագահին դիմեցին՝ Արցախի եւ Հայաստանի անվտանգութիւնը երաշխաւորելու կոչով:
Ֆրանսայի տարբեր կուսակցութիւններու քաղաքական առաջնորդներ, հակառակ քաղաքական տարբերող հայեացքներուն, համատեղ բաց նամակ մը հրապարակեցին Ֆրանսայի մէջ ամէնէն մեծ լսարանը ունեցող «Լէ Մոնտ» օրաթերթին մէջ՝ հայցելով Ֆրանսայի նախագահի միջամտութիւնը՝ Արցախի եւ Հայաստանի Հանրապետութեան անվտանգութիւնը երաշխաւորելու համար։ Այս մասին ֆէյսպուքեան իր էջով տեղեկացուցած է Ֆրանսայի մէջ Հայաստանի դեսպանութիւնը: Նամակին մէջ առաջարկուած է.
- Դատապարտել Ատրպէճանը՝ միջազգային իրաւունքի դրոյթները խախտելու, Հայաստանի Հանրապետութեան տարածքէն մաս մը բռնագրաւելու եւ պատերազմական ոճիրներ գործելու համար:
- Արցախի մէջ նախատեսել մարդասիրական ներկայութիւն, եւ Հայաստանին ցուցաբերել անյապաղ տնտեսական օժանդակութիւն:
- Հանդիպիլ Արցախի ներկայացուցիչներուն հետ:
- Միջնորդել Եւրոպական միութեան եւ Ամերիկայի Միացեալ Նահանգներու գործընկերներուն հետ՝ քայլեր ձեռնարկելու, եւ անոնց հետ Ատրպէճանի դէմ սահմանել տնտեսական եւ քաղաքական պատժամիջոցներ:
- Միջնորդել Եւրոպական միութեան եւ Ամերիկայի Միացեալ Նահանգներու մեր գործընկերներուն հետ՝ վերագործարկելու Ստեփանակերտի օդակայանը եւ ապահովելու Արցախի հետ օդային կապի անվտանգութիւնը:
- Հայց ներկայացնել Միջազգային քրէական դատարան՝ ՄԱԿ-ի Անվտանգութեան խորհուրդի կողմէ միջազգային խաղաղապահ զօրախումբ ուղարկելու հեռանկարով:

https://armenpress.am/arm/news/1100678.html?fbclid=IwAR2_Q7hIIw3yH_fGygVGbb_2-lt9DH8hNcfoA7skKLHsg640ipZCjYo4KhM
https://www.lemonde.fr/idees/article/2022/12/27/emmanuel-macron-doit-tout-mettre-en-uvre-pour-garantir-la-securite-des-armeniens-du-haut-karabakh-et-de-la-republique-d-armenie_6155806_3232.html?fbclid=IwAR2H79-mrY_6e6g4UV26EPjEi14TOBvyLmLFRgS3CGOy3V2cUNtFUysPmnI