Երէկ Երեւանի Մատենադարանին մէջ «Աւրորա» մարդասիրական նախաձեռնութիւնը յայտարարեց 2022 թուականի «Աւրորա»-ի հերոսներուն անունները, որոնք ընտրուած են իրենց ունեցած ազդեցութեան, քաջութեան ու նուիրուածութեան համար: Անոնք իրենց կեանքը վտանգի տակ դրած են օգնելու համար ուրիշներուն:
1.000.000 տոլար մրցանակը կը շնորհուի Հայոց ցեղասպանութիւնը վերապրողներուն անունով՝ ի երախտագիտութիւն զանոնք փրկողներուն, արձագանգելով մարդասիրական խնդիրներուն ամբողջ աշխարհին մէջ: Անոնցմէ մէկը պիտի դառնայ «Աւրորա 2022»-ի դափնեկիր:
«Աւրորա 2022»-ի հերոսներն են՝
Ժամիլա Աֆղանի (Աֆղանիստան)՝ խաղաղութեան աքթիւիստ եւ «Նուռ» կրթութեան եւ կարողութիւններու զարգացման կազմակերպութեան (NECDO) հիմնադիր, որ կ'աշխատի կրթութիւնը հասանելի դարձնել կանանց:
Հատի Ժուման (Եմէն)՝ խաղաղութեան աքթիւիստ եւ միջնորդ-բանակցող Եմէնէն: Ան կ'աշխատի կազմակերպելու ռազմագերիներու փոխանակումը եւ առաջնագիծէն դուրս բերելու այնտեղ մնացած զոհուածներուն մարմինները:
Մահինուր էլ-Մասրի (Եգիպտոս)՝ եգիպտացի փաստաբան եւ քաղաքական աքթիւիստ, որ կը պայքարի երկրի քաղաքական ազատութիւններուն եւ մարդու իրաւունքներուն համար՝ կազմակերպելով բողոքի խաղաղ ցոյցեր:
Ամբողջական լուրը՝ armradio.am.
